İnqilab Rəhbərinin İslam Şurası Məclisinin açılış ildönümü və on ikinci Məclisin fəaliyyətinin üçüncü ilinin başlanması münasibətilə mesajı

İnqiBağışlayan və mehriban Allahın adı ilə

Mübarək Qurban bayramını və İslam Şurası Məclisinin ilk dövrəsinin açılış ildönümünü münasibətilə əziz İran İslam xalqını və İslam Şurası Məclisinin hörmətli nümayəndələrini təbrik edir, bu münasibətlə nümayəndələrin, xüsusilə İslam Şurası Məclisinin hörmətli sədri cənab doktor Qalibafın ölkənin yüksəlişi yolundakı səylərini yüksək qiymətləndirirəm.

İslam Şurası Məclisi millətin xülasəsi, dini xalq hakimiyyətinin təzahürü və İslam Respublikasında qanun və qanunvericiliyin əsas sütunudur ki, xalq iradəsinin həyata keçirilməsində mühüm rol oynayır. İndi Müqəddəs Üçüncü Müdafiədən üç ay keçdiyi bir vaxtda, İran xalqının iman, ümid və əməl baxımından batini mahiyyəti və həqiqi cövhəri dosta da, düşmənə də sübut olunmuşdur və İran xalqının səviyyəsinin yüksəlməsi millətin fəzilətlərinin cövhərinin heyrətamiz təcəllisini üzə çıxarmışdır.

Həqiqi xalq nümayəndəsi xalqın özündən olmalı olduğu üçün hazırkı mərhələ nümayəndələr və İslam Şurası Məclisində xalqın dirçəlişinin təcəllisi baxımından dönüş nöqtəsidir ki, onlar öz rol və məsuliyyətlərini ayağa qalxmış xalqın səviyyəsinə uyğun şəkildə tənzimləsinlər və daha artıq fəaliyyət və təşəbbüslə qanunvericilik və nəzarəti İslami olan İranın gələcəyinin istiqamətləndirilməsi yolunda sürətləndirib dərinləşdirsinlər.

Bu cihad meydanında nümayəndəlik kürsüsü ölkənin inkişafı yolunda müsbətə doğru dəyişikliyin ön cəbhə səngəri hesab olunur. Buna görə də layiqdir ki, millətin nümayəndələri Uca Haqqın inayətlərinə təvəkkül edərək, Ağamız və mövlamız olan Həzrətə (Allah şərafətli zühurunu tezləşdirsin) təvəssül etməklə, Amerika-sionist təcavüzü nəticəsində baş vermiş iki tətbiq olunmuş müharibənin məzlum şəhidlərinin pak qanlarını, xüsusilə də əzəmətli şəhid Rəhbərimizin (Allah uca məqamını daha da uca etsin) xatirəsini uca tutaraq, qanunverici hakimiyyətin müstəqilliyini qorumaq şərtilə dövlət və digər qurumlarla həmfikir və bir-birini tamamlayan idarəçilik istiqamətində bütün güc və imkanlarını mücahidcəsinə ölkənin layiqli şəkildə yenidən qurulmasına, xalqın qayğılarının, xüsusilə iqtisadi və məişət problemlərinin həllinə, istehsal və məşğulluğun canlanmasına, elm və sənayenin səviyyəsinin yüksəldilməsinə, mədəniyyət və əxlaqın inkişafına, maliyyə korrupsiyasına qarşı mübarizəyə, inflyasiya və bahalığın nəzarət altına alınmasına və hərtərəfli məhrumiyyətin aradan qaldırılmasına sərf etsinlər.

Bu əsasla zəruridir ki, Məclisin qəbul etdiyi qərarlar ölkənin əsas məsələləri və xalqın ehtiyacları ilə birbaşa və aydın əlaqəyə malik olsun, ümid yaratmağa və ölkənin gələcəyini qurmağa yönəlsin. Cəmiyyət hər şeydən əvvəl ümidin real əlamətlərini, sabit bir yolu və gələcəyə dair aydın bir mənzərə görməyə ehtiyac duyur ki, buna əsasən proqram qura və hərəkət edə bilsin. Məclis nümayəndələri də öz mövqeləri, qərarları və çıxışları ilə İslam Şurası Məclisini ümidvarlıq yaradan öncül bir quruma çevirə bilərlər. O cümlədən hazırkı şəraitdə icra və məhkəmə orqanları ilə birlikdə, 2026-cı ildə “Milli birlik və milli təhlükəsizlik sayəsində müqavimət iqtisadiyyatı” şüarı əsasında iqtisadi sabitliyi, inflyasiyanın azaldılmasını, pul kütləsinin idarə olunmasını, istehsalın canlandırılmasını, Yeddinci İnkişaf Proqramının islahını və ikinci və üçüncü tətbiq olunmuş müharibələrin vurduğu zərərlərin yenidən bərpası ilə bağlı məsələlərin əlavə edilməsini əsas gündəm seçməli, dövlətin və digər sahələrin hazırkı şəraitdə və müharibədən sonrakı dövrdə hərəkət yol xəritəsini müəyyənləşdirməlidirlər.

Ayağa qalxmış xalqın səviyyəsinə uyğun rol ifa etmək üçün müxtəlif hazırlıq və tələblər də lazımdır. Bu qısa fürsətdə yalnız hörmətli qardaş və bacılara əzəmətli şəhid Rəhbərin (Allah məqamını daha da uca etsin) İslam Şurası Məclisinin nümayəndələri ilə illik görüşlərdə, xüsusilə son illərdə buyurduğu, mühüm təcrübi və əməli dəyərə malik çıxışların təfərrüatını diqqət və ciddiyyətlə mütaliə etməyi tövsiyə edirəm.

Təbiidir ki, fərdi təqvaya riayət olunması həmin tövsiyələrin həyata keçirilməsinin və hazırkı həssas mərhələdə ağır vəzifələrin düzgün şəkildə yerinə yetirilməsinin təminində əsas rol oynayır. Birinci dərəcəli məsələlərin düzgün müəyyənləşdirilməsi, dərin ekspert araşdırmaları və məsləhətləşmələrə əsaslanan rəylər, xalqla geniş formada əlaqə və geniş ictimai əlaqələr, korrupsiyaya qarşı hərtərəfli mübarizə, milli maraqların və ümumi ictimai tələblərin cinah, qrup və regional maraqlardan üstün tutulması, parlament diplomatiyasına diqqət, hegemon güclərin həddən artıq istəkləri qarşısında şücaətli, şəffaf və qətiyyətli mövqelərin bildirilməsi, eləcə də İranın region və dünyadakı yeni mövqeyinə düşünülmüş şəkildə və inqilabi diqqət bu tələblər sırasındadır.

Təqvanın nümunələrindən biri də İslami olan İranın bayrağı ətrafında ayağa qalxmış xalqa bəxş olunmuş böyük milli birlik və misilsiz həmrəyliyin qorunmasıdır ki, bu da böyük şeytan qarşısında qələbənin ən mühüm amillərindəndir. Bu nemətin şükrü, millətin bütün təbəqələrinin, xüsusilə fikir və siyasət adamlarının, o cümlədən Məclis deputatlarının bu birliyi qorumağa çalışması, boş siyasi ixtilaflardan və ictimai fərqlilikləri qabartmaqdan çəkinməsidir.

Düşmənin məcburi müharibədən, iqtisadi təzyiqlərdən və təbliğati-siyasi mühasirədən sonrakı puç planı və layihəsi, hərbi meydandakı məğlubiyyətlərini tarazlaşdırmaq və milləti diz çökdürmək üçün təfriqə və ictimai parçalanma yaratmaqdır. Buna görə də qəlbi İslam və inqilab, yaxud İranın istiqlaliyyəti və ucalığı üçün döyünən bütün fədakarlar bundan sonra daha artıq şəkildə millətin sıx və bir-birinə bağlı sıralarının birliyini qorumağa çalışmalı, əsassız, hətta əsaslı fikir ayrılıqlarını çəkişmə və təfriqəyə çevirməməli, söz və əməl baxımından millətin birlik və həmrəyliyinin təcəssümü olmalıdırlar, inşallah.

Sizə, zülm və dövrün yırtıcı və xəbis təcavüzkarları qarşısında sinəsini sipər etmiş və tarixi doğru istiqamətə yönəldən layiqli bir millətin nümayəndəliyi kimi olduqca ağır vəzifənizdə uğurlar arzulayıram. Ümidvaram ki, ağamızın (Allah şərəfli zühurnu tezləşdirsin) duası sizin üçün İlahi uğurların səbəbi və yardımçısı olsun.

Allahın salamı, rəhmət və bərəkəti üzərinizə olsun.

Seyid Müctəba Hüseyni Xamenei

28.05.2026